പുതിയ തലമുറയിലെ പെണ്‍കുട്ടികള്‍ വിവാഹം കഴിക്കാന്‍ ഇഷ്ടപ്പെടാത്തതിന്റെ 5 കാരണങ്ങള്‍.................................

സമൂഹ വ്യവസ്ഥിതയുടെ ഭാഗമായി ഒഴിച്ചുകൂടാനാവാത്ത ഒന്നായാണ് നമ്മള്‍ വിവാഹത്തെ കാണുന്നത്. നിയമത്തിന്റെ പിന്‍ബലത്തോടെയും സമൂഹത്തിന്റെ അംഗീകാരത്തോടെയും സ്ത്രീയുംപുരുഷനും ഒന്നിച്ചു ജീവിക്കുമ്പോള്‍ അതിനെ മാന്യമായ ഒരു വിവാഹ ജീവിതമായി കണക്കാക്കുന്നതാണ് നമ്മുടെ കാഴ്ചപ്പാട്. ഒരു പെണ്‍കുട്ടി ജനിക്കുന്നതു മുതല്‍ അവളുടെ വിവാഹത്തെക്കുറിച്ച് സ്വപ്നം കണ്ടു തുടങ്ങുന്നതാണ് ഒരു ശരാശരി മാതാപിതാക്കളുടെ രീതി. അതിനായി അവര്‍ അവരുടെ ആരോഗ്യവും അദ്ധ്വാനവും സമയവുമെല്ലാം അതിനായി നീക്കിവയ്ക്കുന്നു. ഒപ്പം അവര്‍ തങ്ങളുടെ ചിന്തകളോട് ചേര്‍ന്ന് വളരാന്‍ അവര്‍ കുട്ടികളെ നിര്‍ബന്ധിക്കുകയും ചെയ്യുന്നു.


എന്നാല്‍ ഇന്നത്തെ തലമുറയിലുള്ള പെണ്‍കുട്ടികള്‍ പലരും വിവാഹം നീട്ടിക്കൊണ്ടു പോകുന്നതിനോ ഒഴിവാക്കുന്നതിനോ ശ്രമിക്കുന്നതായി കാണാം. പഠനം കഴിഞ്ഞതിനു ശേഷം, അല്ലെങ്കില്‍ ഒരു ജോലി കിട്ടി സാമ്പത്തിക ഭദ്രത ഉറപ്പു വരുത്തിയതിനു ശേഷം മതി വിവാഹമെന്ന് പറയുന്നവരാണ് പെണ്‍കുട്ടികളില്‍ ഭൂരിഭാഗവും. പലരും വീട്ടുകാരുടെ നിര്‍ബന്ധത്തിനു വഴങ്ങി വിവാഹത്തിന് സമ്മതം മൂളുന്നവരാണ്. എങ്കിലും സ്ത്രീകള്‍ വിവാഹത്തെ വെറുക്കുന്നതിനു മറ്റു ചില കാരണങ്ങള്‍കൂടിയുണ്ട്. അവ എന്തൊക്കെയാണെന്ന് നമുക്ക് നോക്കാം.

1. മാതാപിതാക്കള്‍ തമ്മില്‍ സന്തോഷകരമായ ബന്ധം നിലനിക്കാത്ത കുടുംബത്തില്‍ വളരുന്ന കുട്ടികള്‍പൊതുവേ വിവാഹ ജീവിതത്തോട് താല്പര്യം കാണിക്കാതെ വരുന്നു. വിവാഹ ജീവിതം കഷ്ടപ്പാടുകളുടെയും വീര്‍പ്പുമുട്ടലുകളുടെയും ലോകമാണെന്നു അവര്‍ കരുതുന്നു.

2. വീട്ടുകാരുടെയും നാട്ടുകാരുടെയും നിര്‍ബന്ധത്തിനു വഴങ്ങി വിവാഹിതരായാലും പിന്നീട് അതൊരു ബാധ്യതയായി തോന്നുന്ന പലരുടെയും ജീവിതം കാണുന്ന പെണ്‍കുട്ടികള്‍, വളര്‍ന്നു വരുംതോറും വിവാഹമെന്ന ചിന്ത അവരെ തന്നെ പേടിപ്പെടുത്തുന്നതാക്കുന്നു.

3. അത്രയും കാലം വളര്‍ന്നു വന്ന സാഹചര്യങ്ങളില്‍ നിന്നും മാറി മറ്റൊരിടത്തേക്ക് പോകേണ്ടി വരുന്നതിന്റെ മാനസിക സംഘര്‍ഷങ്ങളും കുറവല്ല. തികച്ചും അപരിചിതരായ ആളുകളുടെയും അന്തരീക്ഷത്തിന്റെയും നടുവില്‍ അവര്‍ ശ്വാസം മുട്ടല്‍ അനുഭവിക്കേണ്ടി വരുന്നു. മാത്രമല്ല അന്നുവരെ അമ്മയുടെ കൈപ്പുണ്യമറിഞ്ഞു ഭക്ഷണം കഴിച്ചു ജീവിച്ചവര്‍ക്കു അടുക്കളയില്‍ കയറാനുള്ള മടിയുണ്ടാവുക എന്നതും സ്വാഭാവികം. ഇതും ചിലരെ വിവാഹ ബന്ധത്തില്‍നിന്നും അകന്നു നില്‍ക്കാന്‍ പ്രേരിപ്പിക്കുന്നുണ്ട് എന്നതാണ് സത്യം.

4. നല്ല ശമ്പളമുള്ള ജോലി, ജോലിയിലെ ഉയര്‍ച്ച തുടങ്ങിയ കാര്യങ്ങള്‍ മനസ്സില്‍ താലോലിക്കുന്നവര്‍ക്കു വിവാഹ ജീവിതം ഇതിനൊക്കെ ഒരു തടസ്സമായി തോന്നുന്നു. വിവാഹവും കുട്ടികള്‍ ഉണ്ടാകുന്നതുമൊക്കെ തന്റെ സൗന്ദര്യം കെടുത്തുന്ന കാര്യങ്ങളാണെന്ന് ചിന്തിക്കുന്ന സ്ത്രീകളും കുറവല്ല. ആരെയും ആശ്രയിക്കാതെ സ്വന്തം വരുമാനത്തില്‍ സ്വസ്ഥമായി ജീവിക്കുക എന്നതാണ് ഇവര്‍ക്ക് സന്തോഷം നല്‍കുന്നത്.

5. വിവാഹം വെറുമൊരു ആചാരം മാത്രമാണെന്നും മറ്റൊരാളുടെ പേരില്‍ അറിയപ്പെടേണ്ടി വരുന്ന ഒരവസ്ഥ മാത്രമേ ഇതുകൊണ്ട് ഉണ്ടാകുന്നുള്ളൂ എന്നും കരുതുന്ന പെണ്‍കുട്ടികള്‍ ഉണ്ട്. അവിടെയുണ്ടാകുന്ന ദുരിതങ്ങളില്‍ നിന്നും രക്ഷപ്പെടണമെങ്കില്‍ നിയമം അനുവദിക്കണമെന്ന രീതിയും ഇവര്‍ക്ക് അംഗീകരിക്കാനാകുന്നില്ല.