ഇത്രയും അവഗണിച്ചിട്ടും എങ്ങനെയാ പെണ്ണേ നിനക്കെന്നെ സ്നേഹിക്കാന് കഴിയുന്നത്........ എന്ന ചോദ്യത്തിന് ഭാര്യ നല്കിയ മറുപടി കേട്ട അയാള് തരിച്ചിരുന്നു!
'നീ ഇങ്ങനെ അവളെയും മനസ്സിലിട്ട് നടന്നോ.... എനിക്ക് വയ്യാതായിതുടങ്ങി .... നിന്നെ പുറത്തെടുക്കാന് ഉള്പ്പടെ നാലു ഓപ്പറേഷന് ചെയ്ത ശരീരമാ..'' എന്നുള്ള അമ്മയുടെ വാക്ക് കേട്ട് കൊണ്ട് ദേഷ്യത്തോടെയാണ് വീട്ടില് നിന്നും ഇറങ്ങിയത്,
നഷ്ടപ്രണയത്തില് മനസ്സ് മടുത്ത എന്റെയടുത്ത് അമ്മയുടെ ഇതുവരെയുള്ള വാക്കുകള് ഒന്നും വിലപ്പോയില്ലെങ്കിലും , ആ കണ്ണു നിറഞ്ഞത് കണ്ടാണു പെണ്ണുകാണാന് പോകാമെന്ന വാക്ക് കൊടുത്തത്...
തുടക്കത്തില് , കാണുന്ന പെണ്ണിനൊന്നും പാറുവിന്റെയത്രയും മുടിയില്ല, കളറില്ല എന്നൊക്കെ പറഞ്ഞ് ഒഴിവാക്കിയെങ്കിലും അവസാനം മനസ്സില്ലാ മനസ്സോടെ അധികം സൗന്ദര്യമില്ലാത്ത അമ്മുവിനെ തന്നെ കൂടെക്കൂട്ടി,
ആദ്യ രാത്രിയില്, തന്നെ നാലു വര്ഷം പ്രണയിച്ചിട്ട്, ദുബായ്പണക്കാരനെ കണ്ടപ്പോള് ഒരു സോറിയില് എല്ലാം അവസാനിപ്പിച്ച പാര്വ്വതിയുടെ കഥയോടൊപ്പം , അവളെ മനസ്സില് നിന്ന് കളയാന് കുറച്ച് സമയം വേണമെന്ന എന്റെ ആവശ്യം ഒരു ചെറു ചിരിയോടെ അവള് സമ്മതിച്ചു....
അവഗണന അധികമായപ്പോഴായിരുന്നു, ''എന്തിനായിരുന്നേട്ടാ എന്നോട്...?? എന്ന ചോദ്യം വിതുമ്പലോടെ പൊട്ടിവീണത്. അമ്മയുടെ നിര്ബന്ധം കൊണ്ട് മാത്രമാണ് നിന്നെ കെട്ടിയതെന്നുള്ള എന്റെ മറുപടി കേട്ട് മുഖം താഴ്ത്തി അവള് അകന്നുമാറിയപ്പോഴും എന്റെയുള്ളില് കുറ്റബോധമുണ്ടായിരുന്നില്ല.
റൂമില് പോലും രണ്ടറ്റത്തായിരുന്ന ഞങ്ങള് , പക്ഷേ മറ്റുള്ളവരുടെ മുന്നില് അവള് നല്ലൊരു ഭാര്യയായിരുന്നു, അന്ന് കുളി കഴിഞ്ഞ് ഇറങ്ങിയ ഞാന് പേഴ്സ് തുറന്നിരിക്കുന്നത് കണ്ട് നോക്കിയപ്പോഴാണു, ഒളിപ്പിച്ച് വെച്ചിരുന്ന പാറുവിന്റെ ഫോട്ടോ അവള് കണ്ടെന്ന് മനസ്സിലായത്..
മാസങ്ങള് പിന്നിട്ടിട്ടും മുത്തശ്ശിയാകാതിരുന്നപ്പോള് അവളില് നിന്ന് കാര്യങ്ങള് മനസ്സിലാക്കിയ അമ്മ പറഞ്ഞു. ''അവള് അമ്മയില്ലാത്ത കുട്ടിയാട്ടോ, അവളുടെ മനം നൊന്താല് ദൈവം പൊറുക്കില്ല മോനെ ' ആ വാക്കുകള് എന്നില് മാറ്റങ്ങള് ഒന്നും വരുത്തിയില്ലെന്ന് മാത്രമല്ല, അമ്മയുടെ മുന്നില് ഒറ്റു കൊടുത്തതിന്റെ ദേഷ്യം കൂടിയതേ ഉള്ളൂ....
ജീവിതത്തില് ഒരുപാട് ആഗ്രഹത്തോടെ വാങ്ങിയ ബുള്ളറ്റുമായി വിട്ടിലെത്തിയപ്പോള് ആശയോടെ നോക്കുന്ന അവളുടെ നോട്ടം അവഗണിച്ചു കൊണ്ട് അകത്തെക്ക് പോയെങ്കിലും അവളുടെ കണ്ണിലെ നനവ് എന്റെ ഹൃദയത്തില് തട്ടിയിരുന്നു.
തിരിച്ചിറങ്ങാന് നേരം ജനലിന്റെ മറവിലുടെ എന്നെ നോക്കി നില്ക്കുന്ന അവളോട് കണ്ണു ചിമ്മി കാണിച്ചിട്ട് പോരുന്നോ ഒരു റൈഡിനെന്ന് ചോദിച്ചപ്പോള് അടക്കി വെച്ചിരുന്ന അവളുടെ സങ്കടങ്ങള് അണ പൊട്ടി ഒഴുകിയിരുന്നു..
ബുള്ളറ്റിന്റെ പുറകില് നിന്ന് വീഴാതിരിക്കാന് കഷ്ടപ്പെട്ട അവളുടെ കൈകള് സ്റ്റാന്ഡില് നിന്നും എന്റെ വയറിലെക്ക് ഞാന് പിടിപ്പിച്ചപ്പോള് അവളുടെ കണ്ണുനീര് എന്റെ പുറം നനച്ചു.
'' ഇത്രമാത്രം അവഗണിച്ചിട്ടും എങ്ങനെയാ പെണ്ണെ നിനക്ക് എന്നെ സ്നേഹിക്കാന് കഴിയുന്നത് ????? ' അറിയാതെ ചോദിച്ചു പോയി.
'' അവളാണു പോയതെങ്കിലും ഏട്ടന് എന്നോട് പറഞ്ഞത് അവളോടുള്ള ഇഷടം മാറും വരെ ക്ഷമിക്കാനല്ലേ , അപ്പോഴും ഏട്ടന് അവളെ വെറുത്തിട്ടില്ലല്ലോ. സ്നേഹിച്ച് തുടങ്ങിയാല് ഈ ലോകത്തുള്ള എന്തിനെക്കാളും ഏട്ടന് എന്നെ സ്നേഹിക്കും എന്ന് എനിക്ക് ഉറപ്പായിരുന്നു.'' അതുപറയുമ്പോള് ഞാന് കെട്ടിയ താലി അവള് ഹൃദയത്തോട് ചേര്ത്തുപിടിച്ചിരുന്നു. പിന്നില് നിന്നും വരിഞ്ഞു മുറുക്കി ഇതാണെന്റെ ജീവിതവും സന്തോഷവും ഏട്ടാ...എന്നവള് പറഞ്ഞപ്പോള് വണ്ടി നിര്ത്തി പേഴ്സില് നിന്നും പാറുവിന്റെ ഫോട്ടോ ക്Iറി അവളുടെ മുന്നിലേക്കിട്ടു ... അപ്പോഴും അന്തം വിട്ട് എന്നെ നോക്കുന്നുണ്ടായിരുന്നു ആ പാവം...
ഞങ്ങളുടെ ഇടയില് ഒരു കുട്ടി കാന്താരി വന്നതിന്റെ സന്തോഷം അല തല്ലുമ്പോഴാണു, ബ്ലഡ് ക്യാന്സറുമായി ദുബായില് നിന്നും പാറു തിരിച്ച് വന്നുന്ന് അറിഞ്ഞത്.. കാണാന് മടിച്ചെങ്കിലും പാറുവിനെ കാണാന് എന്നെ നിര്ബന്ധിച്ചത് അമ്മുവായിരുന്നു... നേരില് കണ്ടപ്പോള് കൈകള് കൂപ്പി മാപ്പ് ചോദിച്ച അവളെ ആശ്വസിപ്പിച്ചതും അമ്മുവായിരുന്നു...
തിരിച്ചിറങ്ങാന് നേരം അമ്മുന്റെ കൈയ്യില് ഇരുന്ന ഞങ്ങളുടെ കാന്താരിയുടെ പേരും പാറുന്നാണെന്ന് അറിഞ്ഞപ്പൊള് ഒരുപാട് അത്ഭുതത്തോടെയും , അസൂയയോടെയും അവള് നോക്കുന്നുണ്ടായിരുന്നു എന്റെ അമ്മൂന്റെ മുഖത്തേക്ക് ...
രചന: ഷാനവാസ് ജലാല്
Comments
Post a Comment