അവിശ്വസനീയമായ 14 ജോലികള്‍.. ഇങ്ങനേം ഉണ്ടോ ജോലി.............

രാവിലെ 9 മുതല്‍ വൈകുനേരം 5 മണി വരെയുള്ള ഓഫീസ് ജോലി ചെയ്ത് മടുത്തവരാണ് മലയാളികളില്‍ ഭൂരിഭാഗം പേരും. എന്നാല്‍ നിങ്ങള്‍ക്ക് വിശ്വസിക്കാന്‍ പോലും കഴിയാത്ത ജോലി ചെയ്ത് ജീവിക്കുന്ന വളരെ ചുരുക്കം ചിലരും ഈ ഭൂഗോളത്തിലുണ്ട്. നിങ്ങള്‍ക്ക് ഒരുപക്ഷെ തോന്നിയേക്കാം, ഇതൊക്കെ ഒരു തൊഴിലാണോയെന്ന്! തുടര്‍ന്ന് വായിക്കുക...

14 - ആലിംഗനം ഒരു തൊഴിലാകുമ്പോള്‍

യാതൊരു ഉത്തരവാദിത്തങ്ങളും വൈകാരിക കെട്ടുപാടുകളൊന്നുമില്ലാതെ തന്നെ നിങ്ങള്‍ക്ക് മറ്റൊരാളുടെ ആശ്ലേഷമോ ആലിംഗനമൊക്കെ ആസ്വദിക്കാം. അവരുടെ നെഞ്ചോട് പറ്റിച്ചേര്‍ന്ന് കിടക്കാം, എത്ര നേരം വേണമെകിലും. മണിക്കൂറിനനുസരിച്ച് പണം നല്‍കിയാല്‍ മതിയാകും...! ഈ നൈമിഷിക സൗഹൃദം സേവനം നല്കാന്‍ 'ആലിംഗനവൃത്തി' ചെയ്ത് ജീവിക്കുന്ന കുറച്ചധികം തൊഴിലാളികള്‍ പാശ്ചാത്യലോകത്തിലുണ്ട്. മണിക്കൂറിന് 60 മുതല്‍ 80 ഡോളര്‍ വരെയാണ് ഇവര്‍ വാങ്ങിക്കുന്ന തുക. പ്രത്യേകം ശ്രദ്ധയ്ക്ക്: സൗഹൃദ സംഭാഷണങ്ങള്‍ക്കും ആലിംഗനങ്ങള്‍ക്കുമപ്പുറം എന്തെങ്കിലും പ്രതീക്ഷിക്കുന്നുണ്ടെങ്കില്‍ നിങ്ങള്‍ വല്ലാതെ നിരാശപ്പെട്ടേക്കാം.

13 - ഗോള്‍ഫ് ബോള്‍ മുങ്ങിയെടുക്കുക

ഗോള്‍ഫ് മൈതാനങ്ങളിലെ കുളങ്ങളില്‍ മുങ്ങിപ്പോയ ഗോള്‍ഫ് പന്തുകള്‍ മുങ്ങിയെടുക്കുന്നത് ഉപജീവനമാര്‍ഗ്ഗമായി തിരഞ്ഞെടുത്തവരുണ്ട്. ഇതൊരു എളുപ്പമുള്ള ജോലിയാണെന്ന് തീരുമാനിക്കാന്‍ വരട്ടെ... ഗോള്‍ഫ് മൈതാനങ്ങളിലെ കുളങ്ങള്‍ യാതൊരു ശ്രദ്ധയും കിട്ടാതെ കിടക്കുന്ന ജലാശയങ്ങളാണ്.അതുകൊണ്ട് കുളമാകെ കുളമായി കിടക്കുകയാണെന്ന് തന്നെ പറയാം. മാലിന്യവും, ചെളിയും അഴുക്കും പായലുമായി കിടക്കുന്ന ഈ കുളത്തില്‍ ഇഴജന്തുക്കളുമുണ്ട്. ഈ ജോലി എന്ത് മാത്രം ക്ലേശം നിറഞ്ഞതാണെന്ന് ഇപ്പോള്‍ മനസിലായില്ലേ?

12 - വളര്‍ത്തുമൃഗങ്ങളുടെ ഭക്ഷ്യ പരിശോധകന്‍

നിങ്ങളുടെ വളര്‍ത്തുമൃഗങ്ങള്‍ പോഷകം നിറഞ്ഞ നല്ല ഭക്ഷണമാണോ കഴിക്കുന്നതെന്ന് നിങ്ങള്‍ക്ക് സംശയമുണ്ടോ? എങ്കില്‍ ഈ ഭക്ഷ്യ പരിശോധകരെ വിളിക്കാം. ഇവര്‍ വന്ന് നിങ്ങളുടെ വളര്‍ത്തുമൃഗത്തിന്റെ ഭക്ഷണപദാര്‍ത്ഥങ്ങള്‍ രുചിച്ച് നോക്കി, അതിന്റെ രുചിയെപ്പറ്റിയും പോഷകഗുണങ്ങളെപ്പറ്റിയുമൊക്കെ കൃത്യമായി പറഞ്ഞുതരും.

11 - മെത്ത പരിശോധകന്‍

മെത്ത കമ്പനികള്‍ക്കും 5 സ്റ്റാര്‍ ഹോട്ടലുകള്‍ക്കും വേണ്ടി മെത്ത പരിശോധിക്കുന്നത് ഇവരാണ്. വെറുതെ കിടന്നുറങ്ങുന്നതിന് ശമ്പളമോ? അതെ, ഇതിലും നല്ല ജോലി സ്വപ്നങ്ങളില്‍ മാത്രം. പക്ഷെ ഇത് സ്വപ്നം കാണുന്ന പോലെ അത്രയെളുപ്പമല്ല. ഒരു മികച്ച പരിശോധകന്‍ മെത്തയ്ക്ക് കുഴിവുണ്ടോ, ചെരിവുണ്ടോ, അഗ്രങ്ങള്‍ക്ക് ഘനമുണ്ടോയെന്നൊക്കെ അറിയാന്‍ വിവിധ രീതികളില്‍ കിടന്ന് പരിശോധിക്കാന്‍ പഠിച്ചിരിക്കണം. ചുരുക്കത്തില്‍ ഉറക്കത്തിലും ഉണര്‍ന്നിരുന്ന് നിരീക്ഷിക്കാന്‍ പഠിക്കണം.

10 - ടിഷ്യൂ പേപ്പര്‍ മണത്തുനോക്കുന്ന ജോലി

നിങ്ങള്‍ ശ്രദ്ധിച്ചിട്ടുണ്ടാകും നിങ്ങളുപയോഗിക്കുന്ന ടിഷ്യൂ പേപ്പറിന് യാതൊരു വിധത്തിലുള്ള ദുര്‍ഗന്ധവുമില്ലായെന്നുള്ളത്. എന്നാല്‍ ഇതിന് കാരണം ടിഷ്യൂ പേപ്പര്‍ മണത്ത് നോക്കുന്നവരുടെ നിതാന്ത പരിശ്രമമാണ്. ടിഷ്യൂ പേപ്പര്‍ കമ്പനികളിലാണ് ഇത്തരം ജോലി ചെയ്യുന്നവരുടെ ആവശ്യം. എന്നാല്‍ ഈ ജോലി കരസ്ഥമാക്കുകയെന്നുള്ളത് അത്യന്തം ക്ലേശകരമാണ്. അസാധ്യമെന്ന് തന്നെ പറയാം.

9 - മുഖ സ്പര്‍ശകര്‍

ത്വക്ക് പരിചരണ വസ്തുക്കളുടെ കമ്പനികളിലാണ് ഇത്തരം ജോലികള്‍ കാണാന്‍ സാധിക്കുക. കമ്പനിയുടെ ഉല്‍പ്പന്നങ്ങള്‍ ഉപയോഗിക്കുന്ന ആളുകളുടെ മുഖം തടവിനോക്കി എന്തെങ്കിലും മെച്ചമുണ്ടാകുന്നുണ്ടോ എന്ന് നോക്കുന്നതിവരാണ്. ഇനിയെന്തെങ്കിലും അപാകതയുണ്ടാകുന്നുണ്ടെങ്കില്‍ അതുമിവര്‍ കണ്ട് പിടിക്കും. ഇവരുടെ നിഗമനങ്ങള്‍ കമ്പനിയുടെ വളര്‍ച്ചയ്ക്ക് നിര്‍ണ്ണായകമായ പങ്ക് വഹിക്കുന്നു.ഈ ജോലി ചെയ്യാന്‍ സൂക്ഷ്മമായ നിരീക്ഷണപാടവം ആവശ്യമാണ്.

8 - ക്യൂ നില്‍ക്കുന്ന ജോലി

ക്യൂ നില്‍ക്കാന്‍ ഒട്ടുമിഷ്ടമില്ലാത്തവരുടെ നാടായ കേരളത്തില്‍ ഈ ജോലിക്ക് വന്‍ സാധ്യതകളുണ്ട്. പാശ്ചാത്യ നാടുകളില്‍ ഇതൊരു ഉപജീവനമാര്‍ഗ്ഗമായി ചെയ്യുന്നവരുണ്ട്. ചിലപ്പോള്‍ 20 മണിക്കൂര്‍ വരെ ക്യൂ നില്‍ക്കേണ്ടി വന്നേക്കാം. വളരെയധികം മടുപ്പുളവാക്കുന്നൊരു ജോലിയാണിതെങ്കിലും ധാരാളം പണം സമ്പാദിക്കാനാകും.

7 - വാട്ടര്‍ സ്ലൈഡ് പരിശോധകന്‍

വാട്ടര്‍ തീം പാര്‍ക്കുകളിലെ വാട്ടര്‍ സ്ലൈഡറുകളിലൂടെ നിരങ്ങിയിറങ്ങാന്‍ നിങ്ങള്‍ക്ക് പണം കൊടുത്ത് ടിക്കറ്റെടുക്കണമെങ്കില്‍, ഓരോ പ്രാവശ്യവും അതിലൂടെ നിരങ്ങിയിറങ്ങുന്നതിന് ശമ്പളം വാങ്ങിക്കുന്നവരെപ്പറ്റി നിങ്ങളുടെ അഭിപ്രായമെന്താണ്? അതെ അങ്ങനെ കുറച്ചുപേര്‍ ഉണ്ട്.വാട്ടര്‍ തീം പാര്‍ക്കുകളിലാണ് അവര്‍ ജോലി ചെയ്യുന്നത്. ഇത്തരം വാട്ടര്‍ സ്ലൈഡറുകളിലൂടെ പല പ്രാവശ്യം നിരങ്ങിയിറങ്ങി അതിന്റെ സുരക്ഷ പരിശോധിക്കുക, സ്ലൈഡറില്‍ എത്ര വെള്ളം കെട്ടി നില്‍ക്കണെമെന്ന് നിര്‍ണ്ണയിക്കുക, എത്ര വേഗത്തില്‍ പോകുന്നതാണ് ഉചിതമെന്ന് നിര്‍ണ്ണയിക്കുക തുടങ്ങിയ ജോലികളാണ് ഇവര്‍ ചെയ്യുന്നത്.

6 - പാമ്പിന്റെ വിഷമെടുക്കുന്ന ജോലി

പാമ്പിന്റെ വിഷം വൈദ്യശാസ്ത്ര രംഗത്തിലും മരുന്ന് നിര്‍മ്മാണ കമ്പനികളിലും മറ്റും വളരെയധികം ആവശ്യമുള്ള വസ്തുവാണ്. എന്നാല്‍ പാമ്പിനെ കയ്യിലെടുത്ത് അതിന്റെ വിഷമെടുക്കുകയെന്നുള്ളത് അത്യന്തം അപകടം നിറഞ്ഞ ഒരു ജോലിയാണെന്ന് പ്രത്യേകം പറയേണ്ടതില്ലല്ലോ. പാമ്പിനെ കൊല്ലാതെയതിന്റെ വിഷം കൃത്യമായി പ്ലാസ്റ്റിക്ക് കുപ്പികളില്‍ ശേഖരിക്കാന്‍ ഇവര്‍ക്ക് ചിലപ്പോഴൊക്കെ ഒരു ദിവസം മുഴുവന്‍ കഷ്ടപ്പെടേണ്ടി വരുന്നു.

5 - ശരീര ഭാഗങ്ങള്‍ക്ക് വേണ്ടിയുള്ള മോഡല്‍

നിങ്ങള്‍ക്ക് ആകര്‍ഷകമായ കയ്യോ കാലൊയൊക്കെ ഉണ്ടെങ്കില്‍ നിങ്ങളെ ധാരാളം മോഡലിംഗ് അവസരങ്ങള്‍ കാത്തിരിക്കുന്നു. വായിച്ചത് ശരിയാണ്. പരസ്യചിത്രങ്ങള്‍ക്കായി നിങ്ങളുടെ കയ്യുടെയോ കാലിന്റെയോ മാത്രം ചിത്രങ്ങള്‍ ആവശ്യമുള്ള കമ്പനികളുണ്ട്. ഇനി അത്ര ഭംഗിയില്ല, അല്‍പ്പം വൃത്തികേടുണ്ടെങ്കിലോ? അതിനും വിപണിയില്‍ നല്ല സാധ്യതകളുണ്ട്. പരസ്യചിത്രത്തിനായി അത്തരം അംഗങ്ങളുടെ ചിത്രങ്ങള്‍ തേടി നടക്കുന്ന ഉല്‍പ്പന്നങ്ങളും വിപണിയിലുണ്ട്.

4 - മണ്ണിരയെ പിടിക്കുന്ന ജോലി

മണ്ണില്‍ സമയം ചിലവഴിക്കാനിഷ്ടപ്പെടുന്ന വ്യക്തിയാണെങ്കില്‍ ഈ ജോലി നിങ്ങളിഷ്ടപ്പെടും.പുഴകളിലും തോടുകളിലും മീന്‍പിടിക്കാന്‍ പോകുന്നവര്‍ക്ക് മണ്ണിരയുടെ ആവശ്യമുണ്ട്. ഇവര്‍ക്ക് മണ്ണിരയെത്തിച്ച് കൊടുക്കലാണ് ഇവരുടെ പണി.

3 - സാഹസിക സ്റ്റണ്ടുകള്‍ പരിശോധിക്കുന്ന ജോലി

എക്‌സ് ഫാക്ടര്‍, ഫിയര്‍ ഫാക്ടര്‍ തുടങ്ങിയ അന്താരാഷ്ട്ര സാഹസികഷോകളില്‍ കാണിക്കുന്ന സ്റ്റണ്ടുകള്‍ നിങ്ങള്‍ക്ക് ഒരേ സമയം ഭീതിയും ഉത്സാഹവും നിറയ്ക്കുന്നതായിരിക്കാം. ജീവനോടെയുള്ള വണ്ടുകളെ ഭക്ഷിക്കുക തുടങ്ങിയ ചലഞ്ചുകള്‍ മത്സരാര്‍ത്ഥിക്ക് കൊടുക്കുന്നതിന് മുന്‍പ് സ്റ്റണ്ട് പരിശോധകരെക്കൊണ്ട് ഇത്തരം സാഹസങ്ങള്‍ ചെയ്യിപ്പിച്ച് ചലഞ്ചിന് അപകടമൊന്നുമില്ലെന്ന് ഉറപ്പ് വരുത്തും. ഈ അപകടം നിറഞ്ഞ ജോലി ചെയ്യുന്നവര്‍ക്ക് വലിയൊരു തുകയാണ് ശമ്പളമായി നല്‍കുന്നത്.

2 - നഗ്‌ന മോഡല്‍

നഗ്‌ന മേനി പ്രദര്‍ശിപ്പിക്കുന്നത് സദാചാരവിരുദ്ധമായാണ് കാണുന്നത്. എന്നാല്‍ ഇവര്‍ ചിത്രകലാകാരന്മാര്‍ക്കുള്ള മോഡലാകാന്‍ വേണ്ടിയാണ് ഇവര്‍ നഗ്‌ന മേനി പ്രദര്‍ശിപ്പിക്കുന്നത്. ഫോട്ടോഗ്രാഫര്‍മാരുടെ മുന്നില്‍ പോസ് ചെയ്യുന്ന പോലെ അത്രയെളുപ്പമല്ലിത്. മണിക്കൂറോളം അനങ്ങാതെ കലാകാരന്മാരുടെ മുന്‍പില്‍ അനങ്ങാതെയിരിക്കേണ്ടി വരും.

1 - കക്ഷം മണത്ത് നോക്കുന്നവര്‍

എന്തൊരു വൃത്തികെട്ട ജോലിയാണിത്...ഈ ജോലിയൊക്കെ ചെയ്യുന്നത് അല്‍പ്പം പോലും ആത്മാഭിമാനമില്ലാത്തവരാണ് എന്നൊക്കെ ചിന്തിക്കാന്‍ വരട്ടെ. ഡിയോഡ്രന്റ് കമ്പനികളിലാണ് ഇത്തരം ജോലികള്‍ കണ്ടുവരുന്നത്. ഉഷ്ണമുള്ള മുറികള്‍ക്കുള്ളിലും പുറത്തുമൊക്കെയായി മണിക്കൂറില്‍ അറുപതോളം പേരുടെ കക്ഷം ഇവര്‍ക്ക് മണത്ത് നോക്കേണ്ടി വരുന്നുണ്ട്. അവരുടെ നിഗമനങ്ങളാണ് ലോകമൊട്ടാകെയുള്ള മനുഷ്യര്‍ വാസനയ്ക്കായി ഉപയോഗിക്കുന്ന മികച്ച ഡിയോഡ്രന്റുകള്‍.